謝安琪 - 你們的幸福。。。

喺小冊子裡面夏森美話要堅守「謝安琪」呢個品牌係幾咁艱辛，我百分百同意。正如我之前已經講過，大部分專輯都被流行大勢所蒙蔽，帶出嘅訊息往往都係框喺一個鬧市而冇貫穿大街小巷，探索久違咗嘅人性。聽周博賢總會令人思索、反省、不經意地放慢腳步，原來幸福…已經在你身邊。

壹 - 十二月二十 /周博賢/周博賢/

貳 - 潔淨皇后 /英師傅/周博賢/

叁 - 第二天（快樂是…） /英師傅/周博賢/

肆 - 你們的幸福 /Christopher Chak/林夕/

伍 - 臨崖勒馬 /Cousin Fung/黃梓澄+周博賢/

陸 - 少女瑪利亞 /Eric Kwok/周博賢/

柒 - 溫室 /Seasons Lee/周博賢/

捌 - 借過 /Eric Kwok/周博賢/

玖 - 浮雲 /葉秀雯/林若寧/

拾 - 大城小動 /Cousin Fung/周博賢/

拾壹 - 十二月二十二 /黃慧雯/周博賢/

當然唔會首首旋律編曲我都鍾意，尤其舞曲般曲風一直都唔係我杯茶，但係勝在主題夠明顯，歌一直都圍繞住探討快樂嘅原意，幸福嘅根本。「十二月二十」勾起我最初認識謝安琪時嘅熟悉，站在草根立場笑看一班爭到票搭上方舟又如何嘅貴族。「十二月二十二」再延續大災難過後一切歸零，人人平等，當日嘅執著又何必呢？「你們的幸福」旋律極優美但內容是褒是貶真係好憑個人詮釋，我會借歌問“你幸福對了嗎？”

好多人都話末日嘅幕後推手係人類本身唔愛惜地球，所以希望大家可以「臨崖勒馬」。人人做好本份，唔吝嗇付出比平日多一點，你都可以高尚如「少女瑪利亞」。其他嘅歌如果有興趣嘅話，閣下就自己解讀吧。如「大城小動」話，身邊嘅每一件小事可能都係窩心嘅源泉，仔細啲觀察下吧。